محترم قارئین! ماہنامہ عبقری کے وظائف کے متعلق اکثر کہا جاتا ہے کہ کیا عبقری والوں پر اس وظیفے کے فوائد کی وحی نازل ہوئی تھی؟ ہم نے تو آج تک فلاں آیت کا فلاں کمال نہیں سنا تھا۔ ان سب حضرات کی خدمت میں احادیث کی مشہور کتاب ”صحیح بخاری“ کے متعلق جلیل القدر محدثین کے مشاہدات درج ہیں۔

تمام پریشانیوں سے نجات:

امام ابو محمد بن ابی حمزہ رحمۃ اللہ علیہ کا فرمان ہے کہ صحیح بخاری جس حادثے اور جس تکلیف کے خاتمے کیلئے بھی پڑھی جائے گی، بے شک وہ حادثہ اور وہ تکلیف ضرور ختم ہوگی.

(بحوالہ کتاب: فتح الباری صفحہ 12، ارشاد الساری صفحہ 29، اتحاف النبلاء صفحہ 50، تیسیر القاری صفحہ 5)

قحط سالی سے نجات:

عالمِ اسلام کے عظیم مفسر امام ابن کثیر رحمۃ اللہ علیہ فرماتے ہیں: بخاری شریف کو پڑھنے سے قحط سالی سے نجات ملتی ہے اور بارشوں کا نزول ہوتا ہے.

(بحوالہ کتاب: البدایہ والنہایہ جلد 11 صفحہ 24)

خدارا اپنے اکابر و اسلاف کی طرح اعمال سے بننے، پلنے اور بچنے کا یقین حاصل کریں.

مشکلات سے چھٹکارے کی چابی:

استاذ المحدثین، امام سخاوی رحمۃ اللہ علیہ فرماتے ہیں: مشکلات اور مصائب سے چھٹکارا پانے کیلئے سلف صالحین سے ”صحیح بخاری“ کو ختم کرنے کے بکثرت واقعات ملتے ہیں.

(بحوالہ کتاب: فتح المغیث صفحہ 185)

قضائے حاجات اور دفعِ بلیات:

شیخ عبدالحق محدث دہلوی رحمۃ اللہ علیہ لکھتے ہیں: مشائخِ دین رحمہم اللہ اجمعین سے صحیح بخاری کو دفعِ بلیات اور قضائے حاجات کیلئے پڑھنا ثابت ہے اور ان مقاصد میں انہیں کامیابی حاصل ہوئی، حتیٰ کہ بیماریوں سے صحت کیلئے بھی ثقہ علماء نے بخاری شریف کو پڑھا اور اپنے مقصود کو حاصل کیا.

(بحوالہ کتاب: اتحاف النبلاء صفحہ 360)

جنگ میں فتح کا پروانہ:

شیخ تقی الدین ابن دقیق العید رحمۃ اللہ علیہ کے زمانے میں جب تاتاریوں کا حملہ ہوا، تو شام کے حکمران نے انہیں پیغام بھیجا کہ مدرسے کے علماء سے بخاری شریف کا ختم کروائیں۔ چنانچہ ختم ہونے سے ایک روز پہلے ہی فتح ملی اور تاتاری فوج بھاگ کھڑی ہوئی۔

(بحوالہ کتاب: اتحاف النبلاء صفحہ 361)

محترم قارئین! کیا نعوذ باللہ عبقری والوں کی طرح ان تمام شیوخ الحدیث پر بھی وحی نازل ہوئی تھی کہ بخاری شریف میں یہ یہ فوائد ہیں۔ آج تک صحیح بخاری سے روایت لینا تو سب نے سنا تھا، مگر بخاری شریف سے مسائل حل کروانے کا عبقری طریقہ کس کی ایجاد ہے؟